Mtandao wa Mawazo Huru na Habari Chanya

Rasta Model

2009-10-31T15:33:00.001+03:00

Rasta Model, originally uploaded by Kaka Pori.

Hapa anaonekana kaka Ridhwani mi hupenda kumwita iRasta!

Nimerudi .....!!!!!!!

2009-10-24T17:49:00.006+03:00

Jana katika pita pita ya mitaa ya kati nikakutana na timbwili timbwili (sio la asha ngedere) bali ni PAKA vs PANYA. Hebu fuatilia: -

Picha lilianza hivi ......

Halafu likaendelea hivi......

Likaendelea .........

Tutaendelea kesho, hilo ni trela tu!!!

kaka

2007-12-03T12:29:00.001+03:00

kaka, originally uploaded by Kaka Pori.

Just chilling

Kwa Mapenzi Haya .....

2007-06-12T11:46:00.000+03:00

Leo hii ukipita maeneo hasa ya mijini na zaidi katika sehemu za kuuzia vileo, vijiweni, maofisini majumbani na maeneo mengine yenye mikusanyiko si ajau kukuta watu wakibishana juu ya timu mbalimbali za ulaya kama vile Liverpool, Arsenal, Manchester United, Chelsea, Inter Milan, AC Milan, AS Roma, Club Bordoux, FC Monaco, Lyon FC, Marseille, n.k.

Mdau mkubwa wa globu ya picha Tanzania, mjomba Michuzi ni mmoja kati ya kundi kubwa la Watanzania wenye mapenzi ya dhati kabisa na timu za soka za Ulaya.

Bado ukitembelea maeneo hayo hayo niliyoyataja hapo juu ni dhahiri kabisa kusikia watu mbalimbali wakisikiliza muziki na hata wakati mwingine kubishana juu ya muziki hasa kutoka huko huko Ulaya na Marekani. Ukikutana na vijana 10 barabarani leo hii na ukawauliza kama wanawafahamu wanamuziki kama Jay - Z, Rihanna, Ja Rule, 50 Cent, Beyonce, n.k. kama si wote basi 8 kati yao watakwambia kuwa wanawafahamu tena kwa undani wanamuziki hao na kwa mapenzi ya dhati kabisa tuliyonayo kwao si jambo la ajabu kukuta tunavaa nguo zenye picha na nembo zao.

Mfumo wa maisha yetu kwa ujumla umeathiriwa sana tena sana na umagharibi kiasi kwamba asili yetu sasa kwa walio wengi imebaki hadithi tena hadithi ya kale. Tamaduni zetu zinabaki kuwekwa kweny majumba ya makumbusho kwa ajili ya vizazi vijavyo. Mavazi kama khanga, vitenge; tazama picha hapa chini

Yamebaki kuvaliwa kwenye maonyesho ya mavazi na maeneo ya vijijini.

Hali hiyo hapo juu inatokana na maendeleo makubwa ya sayani na teknolojia ambapo upashanaji wa habari na taarifa umekuwa rahisi zaidi kwa kupitia magazeti, majarida, redio, runinga, n.k. Kwa kutumia utandawazi wenzetu wametuzidi ujanja kwa kuweza kupromoti sana tamaduni za kwao na kufanikiwa kutupumbaza sisi na kupelekea kusahau kabisa tamaduni zetu.

Kwa mapenzi tuliyonayo haya tukiyarudisha kwetu na kuwa na uzalendo wa kweli, tunaweza kuchukua muda mfupi sana kupiga hatua za kimaendeleo katika nyanja zote muhimu za kijamii kama vile siasa, uchumi, burudani, n.k.

Shime shime Watanganyika tufikirie upya na kutafuta njia mbadala!!!

Picha zote kwa hisani ya Michuzi

2007-03-26T11:43:00.001+03:00

MK GROUP YAZINDULIWA.

MK Group Logo.

Mdau bingwa wa mitandao MK ambaye ametutengenezea blogu zetu wanablogu wengi wa kibongo hadi zikapendeza anapenda kutufahamisha ya kwamba amefungua website itakayotoa huduma za web hosting, designing na domain Registration.

unaweza kumtembelea kwa kufuata link hii http://www.mkgroupltd.com

jina la kampuni yake ni MK Group ambayo pia inajishughulisha na itajishughulisha na huduma za uuzaji wa mafuta ya Petrol, Diesel na Kerosene bongo...

kazi kwetu

Nafasi ya ufadhili wa Masomo!!

2006-11-24T09:18:00.000+03:00

Habari za leo waungwana!

Nimetumiwa barua pepe kutoka idara ya Rasilimali Watu, Sayansi na Teknolojia ya Umoja wa Afrika (UA - AU) usiku wa jana yenye kichwa cha habari: MWALIMU NYERERE AFRICAN UNION SCHOLARSHIP SCHEME INTRODUCTION. Mstari wa kifo ni tar. 30 Nov, 2006

Maelezo yote kwa kizungu haya hapa: -

DEPARTMENT OF HUMAN RESOURCES, SCIENCE AND TECHNOLOGY

MWALIMU NYERERE AFRICAN UNION SCHOLARSHIP SCHEME INTRODUCTION

The African Union has a vision of peace, integration, prosperity and peerage in the global community; an Africa led by its own people with a proud African identity; where African solutions are developed for African problems.

To achieve the vision of the African Union, engender sustainable development and meet millennium development goals, there is need to step up efforts to develop, nurture and retain a critical mass of human resources, particularly in the areas of science and technology. Support is also necessary to enhance the quality of teaching of these critical disciplines. For this reason, the African Union Commission has established the Mwalimu Nyerere African Union Scholarship Scheme.

The Mwalimu Nyerere African Union Scholarship Scheme is designed to enable African students to undertake degree programmes of study (Bachelors', Masters' and PhD) in leading African Universities, in the areas of science and technology, with a binding agreement that the beneficiaries will work in an African country for 2 to 5 years after graduation.For the first year of the Mwalimu Nyerere AU Scholarship Scheme, the African Union Commission has made provision for up to 50 scholarships at Bachelors' Degree level; all beginning in the year 2007. The next tranche will include scholarships for postgraduate studies.The Scholarship will cover all fees related to tuition and examination, return transport from home town to the University, and a modest subsistence allowance.

CRITERIA FOR SELECTION

Criteria for selection of candidates for the First Tranche are therefore as follows:

(i) Candidates:· Nationals of African Union Member States· Top performers in Member States in

science and technology related fields· Age: below 25 years for Bachelors degree· Admission to

a leading university in any African Union Member State· Must be willing to commit to work in

an African country for a minimum of 3 years after completion of studies.

(ii) Subject areas: The following fields of study will be eligible for scholarship · Engineering and

Technology (Civil, Electrical, mechanical, Chemical engineering)· B.Sc. in various fields,

including biological sciences, chemistry, astronomy, mathematics, physics, quantity surveying,

electronics, Information technology, agriculture, pharmacy

(iii) Country of StudyAny reputable African University in any African Union Member State.

Candidates are encouraged to seek admission from universities in countries other than their

own.

APPLICATION PROCEDURE

Those who meet the listed criteria are requested to apply confidently, by filling in and sending back the attached application form with copies of the following:· Relevant certificates· Letter of admission to a reputable African University· Curriculum vitae indicating age, nationality, working experience, and names and · Contacts of three referees, one of which should be from the school principal of the last school/college attended.Candidates should request referees to send reference letters directly to the AU Commission. Candidates should also explain in an essay of not more than 2,000 words, why they chose their field of study, and its importance to Africa.

Due to the expected high volume of applications, only short-listed candidates will be contacted.Send applications with supporting documents before 30th November 2006, to: -

Head of Education DivisionAfrican Union Commission

P.O. Box 3243,

Addis Ababa Ethiopia

Email nyererescheme@ africa-union. org

Tovuti: www.africa-union.org

SHIME WANAJUMUIA, KAMA HUWEZI WEWE KUNA MWINGINE ANAWEZA MPE NAFASI!!

2006-11-16T19:27:00.000+03:00

hapa nilikuwa nikishiriki e-mkutano juu ya uundwaji wa bodi ya wakurugenzi wa YAC.

Naweka neno kidogo kwenye blogu yangu hasa nikiwa na homa ya Mkutano (ambao napenda kuuita Mkuu) wa kwanza kwa wanablogu wa Tanzania. Harakati hizi zinachangia sana katika kukuza jumuiya yetu mtandaoni (E - Community). Kwa taarifa za leo, mkutano huu utafanyika Novemba 28, 2006 majira ya saa 8 mchana kwa saa za Tanzania. Hapa ndipo nilipododosa taarifa hizo ila kwa taratibu na masuala yote yahusuyo mkutano huo ambao utawezeshwa kwa kutumia mtandao huu hapa, tembelea hapa ambapo maelezo ya kina juu ya mkutano huu yamewekwa na ukipata kukutana na kemera ya mjomba Michuzi basi ameweka maelezo pale kwa urahisi wa kufikika kwenye hicho chumba cha mkutano.

Sina pingamizi la ajenda na wala kiongozi ( kaka msangi) aliyependekezwa kuongoza mkutano huo.

Nataraji ushiriki kamilifu toka kwa wanablogu wote Watanzania katika mkutano huu adhimu. Kama kuna mtu analo azimio la dodoma, basi naomba anitumie katika anuani yangu ya barua pepe tafadhali, nataka kulipitia tena!

Tukutane Mkutanoni

Kwa Taarifa Yako!

2006-08-27T12:48:00.000+03:00

Tangu gonjwa la UKIMWI lilipogundulika duniani, zaidi ya watu milioni 50 katika Afrika wamekwishaambukizwa virusi vyake ambapo watu zaidi ya milioni 22 tayari wameshakufa mpaka sasa. Nchi 21 duniani zinazoongoza kwa kuwa na idadi kubwa ya watu wanaoishi na virusi vya UKIMWI zote zipo kusini mwa Jangwa la Sahara. La kutia hofu zaidi ni kwamba kati ya vijana walio katika umri wa kati ya miaka 14 – 24, asilimia 4.6 ya wanawake na asilimia 1.9 ya wanaume tayari wameshaambukizwa virusi vya UKIMWI.

Tafiti mbalimbali zinaonyesha kwamba katika idadi inayosadikiwa kufikia milioni 40 ya watu ambao tayari wameambukizwa UKIMWI duniani, nchi zinazoendelea zina zaidi ya asilimia 95 ya watu wote wanaoishi na virusi vya UKIMWI. Nchi zilizo kusini mwa Jangwa la Sahara Tanzania ikiwemo ambapo kuna zaidi ya asilimia 10 ya idadi ya watu wote duniani, eneo hilo lina zaidi ya asilimia 65 ya watu wanaoishi na virusi vya UKIMWI ambapo idadi yao hadi kufiki mwishoni mwa mwaka 2005 ilikuwa inafikia watu milioni 25.8. Katika mwaka huo huo wa 2005, idadi ya watu waliopata maambukizi mapya katika nchi zilio kusini mwa Jangwa la Sahara ilikuwa inakadiriwa kufikia milioni 3.5 ambapo idadi ya wazee, vijana, na watoto waliokufa kwa gonjwa hili ilifikia watu milioni 2.4

Pamoja na malaria, vita vya wenyewe kwa wenyewe, lishe duni, umaskini na mengineyo kadha wa kadha, UKIMWI pia ni moja kati ya wazalishaji wakubwa wa watoto yatima katika nchi zilizo kusini mwa Jangwa la Sahara ambapo idadi kubwa ya watoto ambao wazazi ama walezi wamefariki kutokana na ugonjwa huu wanalazimika kuacha shule na wengi wao kukimbilia maeneo ya mijini na kuwa wa watoto mitaani. Wanapokuwa mitaani watoto hawa hujikuta wakijiingiza katika magenge ya kihuni na kushiriki katika matumizi ya wadawa ya kulevya; biashara ya ukahaba haswa kwa wasichana; wizi na kadhalika.

Katika kufikisha ujumbe unaohusu gonjwa hili kwa jamii, njia mbalimbali zilizotumika kama vile matangazo ya redio na runinga, mabango ya barabarani, kushirikisha asasi za kiserikali na zisizo za kiserikali, watu binafsi na kadhalika zimethibitisha kwamba idadi kubwa ya watu ambapo inafikia zaidi ya asilimia 79.6 katika nchi zilizo kusini mwa Jangwa la Sahara wanafahamu juu ya ugonjwa huu kuanzia maambukizi mpaka matokeo yake.Pamoja na matokeo ya tafiti mbalimbali na takwimu zilizooredheshwa hapo juu, kadri siku zinavyozidi kusonga mbele ndivyo idadi ya watu wanaoambukizwa virusi vya UKIMWI nayo inaongezeka kwa kasi ya ajabu.

Je, umeshawahi kujiuliza tatizo liko wapi?

Yaliyojiri Juma Hili!

2006-05-10T19:43:00.000+03:00

Habari za jioni wanablogu wote wa kiswahili na hata wa lugha nyingine mbalimbali duniani.

Kwanza, nachukua fursa hii adhimu kuwa shukuru wote mliotembelea blogu yangu, wale wote mlionipa pole kutokana na masahibu yaliyonikuta, basi nawashukuru sana sana. Naamini nitapona sawa sawia. Kwa taarifa tu ni kwamba, sasa hivi naendelea vizuri, jicho langu limepunguza maumivu kwa kiasi kikubwa sana, na pia bado nazidi kurudisha uoni.

Leo hii pia nina furaha kubwa sana kuwatambulisha wanablogu wawili wapya kabisa katika ulimwengu wa blogu, lakini pia ni wanaharakati madhubuti wa masuala ya haki za binadamu, haki za watu wenye ulemavu, maendeleo na mambo kadhaa chanya kwetu.

Mmoja kati ya hao wanablogu wapya ni ndugu Mkatambo, yeye ni Afisa Sheria Mkuu hapa Kituo cha msaada wa sheria Magomeni.

Mwingine ni Mtanganyika, huyu mheshimiwa naye mambo yake mjionee tu wenyewe.

Kwa kuwa bado sijawa na utaalam wa kuingiza viunga na pia kuwatangaza hawa jamaa katika blogu yangu, naamini wanablogu wenzangu wenye utaalamu huo mtalibeba jukumu hilo kwa utayari na ukamilifu wake. Hata hivyo, bado ninajitahidi kwa kasi ya ajabu katika kuupitia mwongozo wa wanablogu na miongozo mingine, basi si haba labda siku si chache na mimi nitakuwa mbali katika kujitangaza na kuwatangaza wenzangu.

Kwa J'tano ya leo, yaliyojiri ni hayo, wassalaam nawatakia juma jema.

Karibuni wanaharakati

Kimya Kingi ..............

2006-05-06T10:54:00.000+03:00

Amani na Uhuru wa kweli viwe nanyi nyote ndugu zangu. Naandika waraka huu nikiwakumbuka ndugu zangu ambao nimewatupa kwa muda mrefu sana hapa kwenye blogu.

Maisha ni safari, kwa maana hiyo wote tunaoishi hayo maisha basi ni wasafiri. Msemo huu ninausema ukiwa na muktadha wa kuwajulisha wenzangu juu ya mikasa iliyonikuta katika hizo harakati zangu za safari ya maisha. Najua kutokana na kutokuwa na taarifa wengi wenu mmekuwa mkijiuliza huyu Bw. mdogo vp? Mbona haeleweki!!

Kwanza, kabisa nilitingwa sana sana na masuala ya kifamilia kiasi kwamba nilikuwa nakosa kabisa muda wa kuingia mtandaoni.

Lakini pia, mnamo tarehe 2-04-2006 siku ya Jumamosi majira ya saa kumi na mbili asubuhi, nilipatwa na mkasa ambao hata sijui nisemeje. Nimetoka nyumbani maeneo ya Kinondoni B salama salimini, nikapanda daladala ya kuelekea buguruni, nikashuka kituo cha Magomeni Mikumi, nikavuka barabara, huyoo kiguu na njia naelekea ofisini kwangu pale Kituo cha Msaada wa Sheria Magomeni. Wakati nakatiza barabara ya kuingilia soko la Magomeni nyuma yangu kulikuwa na kundi la vijana karibu sita wakija pia katika uelekeo wangu, ghafla nikajikuta nimepigwa roba ya nguvu maana majamaa yalikuwa mashababi kweli kweli huku wakianza kazi ya kunisachi kama nina chochote kile kwa ajili yao, nami nikaanza harakati za kujihami, basi kilichoendelea hapo nimekuja kuhadithiwa siku ya pili. Baada ya kisanga kile ambacho kilichukuwa takriban dakika kumi hivi, nilitolewa pale eneo la tukio na raia wema na kupelekwa hadi ofisini ambapo taratibu zilifanyika na wafanyakazi wenzangu kunipeleka pale kituo cha Polisi Usalama Magomeni, ambapo nilipatiwa PF 3 na kupelekwa mwananyamala hospitali ambapo nilipewa rufaa mpaka Muhimbili, siku hiyo fahamu zilinirejelea baada ya angalau masaa sita hivi tangu alfajiri ile. Wale jamaa hawakufanikiwa kunichukulia chochote kile kati ya vitu ambavyo nilikuwa navyo mfukoni yaani simu na hela kidogo ila wameniachia jeraha litakalonikaa moyoni kwa muda mrefu kiasi. Wameniumiza sana sana jicho langu la kulia kasi kwamba kwa sasa halioni vizuri kabisa. Nimefanya X-Ray karibu sehemu zote muhimu mwilini na kukutwa niko salama jambo ambalo kwalo namshukuru sana mola.

Nimetoka hospitali siku ya J'mosi ya tarehe 29 -04-06 jioni na nimeanza kuja kazini rasmi leo J'mosi ya tarehe 06-05-06.

Lakini pia nikiwa hospitali nilitumia muda huo kutathmini ushiriki wangu kwenye kuendelea hili gurudumu la blogu na kujipanga upya katika uwasilishi wa yale yaliyo moyoni mwangu katika kujenga jamii chanya. Kwa kuanzia, nitakuwa nikiandika kwa mrengo ule ule nilioanza nao awali, pia nitakuwa nikiandika kwa juma mara moja ambapo kwa kuanzia nimeonelea siku ya J'tano kuwa ni siku muafaka kwangu kutoa muktadha ambao nitakuwa nimeukusanya kwa takriban juma lote.

Safari ya maisha bado inaendelea! Tuonane juma lijalo!!!!!

Mwana Mpotevu

2006-03-28T14:37:00.000+03:00

Salam kwa wote. Naamini muwazima wote wa afya tele. Ni muda mrefu saaaana mwenzenu nipo nje kabisa ya ulingo wa blogu. Kuna sababu za kiufundi na za kiteknolojia pia ambazo kwa namna moja au nyingine zimenikwaza. Kwanza, kwa muda mrefu kiasi, nimekuwa nikisafiri kwenda vijijini kabisa katka harakati za kufikisha ujumbe wa haki za binadam na harakati za maendeleo, na kama mjuavyo, maeneo mengi sana ya vijijini nchini kwetu hayajafikiwa na nishati ya umeme sembuse huduma za tarakilishi na intaneti yake. Sina muda mfupi sana tangu nirudi kutokahuko na kukuta nina barua pepe nyingi sana za kujibu na kuzisoma pia. Kaka Makene, nimesoma mail na changamoto yako, sasa nakwambia nimerudi. Nimepitia blog ya macha, safi sana kaka, hizo ni harakati kombozi.

Kwa taarifa yenu, leo kuna taarifa imeandikwa magazetini juu ya Wabunge wa bunge la Tanzania kuchanga kiasi shilingi 40,000/- kwa ajili ya baa la njaa linalowakiabili ndugu zetu vijijini.

Nipo!!

2006-02-27T11:52:00.000+03:00

Habari za siku kadhaa wanaharakati wenzangu. Nilitoka ghafla kidogo nje ya mji hivyo nikawa nimebanwa na mtandao haujatandaa vya kutosha maeneo ya vijijini.

Leo nimepita kuwapa salamu na kuwajulisha kwamba nimerudi, kama umeme hautakatika, basi nitajitahidi nipitie blogu (nadhani neno la Kiswahili bado halijapatikana) zote ili kuwa na taarifa.

Tupo pamoja wajameni!!

2006-02-09T14:36:00.000+03:00

Habari za leo wote!

Naomba niweke IGIZO aliloliweka Kaka yangu mti Mkubwa kupitia kwa mwanablogu mwenzetu Damija.

Hivi majuzi Dennis Londo na MtiMkubwa kupitia kwa damija walituletea kisa cha Mchina kumtwanga Mtanzania hadi kumuua. Leo katika kidirisha cha maoni nimekutana na onyesho kamili la jinsi hali ilivyokuwa, nimeona niwaletee wote tushirikiane kuona hali halisi ya Watanzania tulivyo. Kwa mtindo huu tusije shangaa kukuta 'Mti' kaamua kututengenezea kabisaa filamu yake. Haya onyesho lenyewe hili:-

SEHEMU YA KWANZA:
Mchina mfupi, mdogo kwa umbo, na sura yake kama paka anaonekana anamkimbiza Mtanzania. Mtanzania anakimbia kwa mbio zake zote huku anageukageuka nyuma kuangalia kama atadakwa. Mchina anaongeza kasi. Mtanzania maskini wa MUNGU kasi inapungua kadri anavyozidi kukimbia. Hatimaye Mchina anamkamata Mtanzania.Wakati huo huo wa kumkimbiza Watanzania wengine wanakimbilia nyuma. Siyo kwamba wanakimbilia kumdhibiti Mchina isipokuwa wanakimbilia kuona kibano atakachopewa Mtanzania na Mchina.

SEHEMU YA PILI:
Mchina kamkamata mwizi wake (Mtanzania). Wote wawili wanahema kwa nguvu kwa sababu ya kukimbia. Mchina anamkunja shati Mtanzania. Watanzania wengine wamefika kwenye tukio wanasubiri kuona cha mtema kuni atakachokipata Mtanzania mwenzao. Mchina anaanza shughuli ya kumuadabisha Mtanzania kwa vibao. Kwa kila kibao anachopokea Mtanzania analia "..mama!.." "..ang'i!.." "..mama!.."Wakati huo Watanzania wengine wanashabikia "..Kula eeeh.." "..kula eeeh.." "..k...mae wallai Wachina siyo mchezo cheki anavyopiga kunfuu.." Mchina anaona anaumiza mkono wake kwa sababu jamaa ni sugu sana anachukua chuma anaanza kumbonda nalo kichwani kama anaua nyoka. Mtanzania damu zinamchuruzika kwa majeraha. Watanzania wengine wanaacha kuangalia wengine wanaangalia huku wakisema "..Mchina akikasirika hatari.." "..hawa jamaa huwa hawaongei lakini 'usiwauzi'..Maanake wakikasirika jasho litakutoka.." Mchina anaendelea kubonda kichwa na nondo. Paa la uso linapasuka. Mtanzania sasa halii tena bali anaguna tu kila pigo la nondo likitua "..mmgh.." Pigo jingine "..mmmgh.." na jingine tena "..mmgh.." na jingine tena "..mmgh.." na jingine tena hakuna sauti inayotoka Mtanzania kishapoteza fahamu. Mikono, viatu na nguo za Mchina vimetapakaa damu ya Mtanzania. Mchina anamuangalia mtuhumiwa wake anaridhika na kisago alichompa.

ONYESHO LA TATU
Mchina na wenziye wanachumpa ndani ya gari yao kwenda kunawa na kubadilisha nguo. Watanzania waliokuwepo kwenye tukio wanaondoka wasije wakakutwa na polisi wakatakiwa kutoa ushahidi. "..haroo, yaani yule Mchina arikuwa kakasirika bwana..Maanake arikuwa anampiga kwa nguvu kama nini.." "..Mshikaji tukijikate mandata wasije wakatukuta hapa tukaitwa kwenye ushahidi.." "..Lakini jamaa kajitakia mwenyewe sasa kwa nini aliiba?.." ".unajua mimi nilianza kuwaona tangu wanamkimbiza, nikajua tu leo jamaa ataipata.." "..Hivi arifikiri anaweza kumshinda mbio Mchina..Wachina wanafanya mazoezi ware tangu wadogo.." "..Mimi nirikuwaga nawaonaga wakati wanajenga reri ya tazala, tujamaa tudogo rakini tunabeba mataruma ya reli kama kanabeba rura ya kupigia mistari.."

ONYESHO LA NNE
Mtanzania mmoja mzalendo aliyekereheshwa na kitendo kizima anakwenda kuita polisi baada ya tukio kuisha. Polisi wanakuja na mwandishi wa habari mmoja. Polisi wanampinduapindua maiti. Halafu wanawaamrisha watu "..Hebu sogeeni mbali mnatunyima nafasi.." Polisi mmoja anachapa chapa virungu watu wanasogea mbali kidogo. Wengi wa watazamaji wa tukio ni wanaume vijana na watoto wadogo. Watoto wengine wanamtazama maiti huku macho yamewatoka kama wanatazama sinema ya dracula. Polisi wanampindua marehemu kutoa kitambulisho mfukoni ili kumjua jina lake. Kwa bahati nzuri ana kitambulisho. Wamemtambua jina. Halafu wanampasia mwandishi wa habari kitambulisho. Mwandishi anachukua jina halafu anamrudishia ofisa. Maiti anaokotwa anawekwa nyuma ya Land Rover anapelekwa hospitali. Watanzania wanatawanyika. Eneo la tukio linaachwa na damu halafu polisi wamesahau kuokota nondo iliyotumika kumpigia marehemu. Msamaria mwema anaiokota anaitupa jalalani huku akisema "..Isije ikaua mwingine.."

MWISHO
Mchina anapigiwa simu aende kituoni akatoe maelezo ya tukio. Kituo yupo ofisa upelelezi kesi za jinai. Kiingereza chake siyo kizuri sana kwa hiyo stetimenti ataiandika Kopla Masanja kwa sababu anaongea Kiingereza kizuri zaidi. Mchina anafika kituoni masaa kadhaa baada ya tukio. Stetimenti inaandikwa. Mchina anaambiwa itabidi alale ndani jioni ya leo. Baada ya siku mbili tatu suala linakuwa kati ya Wizara ya Mambo ya Nchi za Nje na Ushirikiano wa Kimataifa na Ubalozi wa China nchini Tanzania. Kwa sababu za kidiplomasia Mchina anakuwa 'dipotedi' Kesi imekwisha.

Watanzania hivi sivyo inavyokuwa? Kama nimekosea kutengeneza onyesho niambieni! Sawa?

Mwelekeo Chanya wenye Ari Mpya, Kasi Mpya na Hoja Mpya!!

2006-02-03T18:24:00.000+03:00

Ndesanjo amepuliza baragumu na wanaharakati kweli wamesikia kwani hii kasi wanayokuja nayo wenzetu mimi naiona ni ya dhamira za dhati kabisa katika kuleta ukombozi. Sina budi kuwakaribisha Jacob Lubuva Suala la ujambazi linaashiria mambo mengi sana ambapo sayansi na teknolojia pia mimi navihusisha kwa karibu sana. Pia ndugu yangu 'yohana mwezi wa kwanza' hapana ni January John karibu sana; suala kumuita Mrema Mh. siyo issue sana hata kwangu mimi pia, ila nakubaliana na wewe kabisa, ikiwezekana wampe hata cheo cha mshauri wa waziri Mwapachu katika masuala ya kudhibiti ujambazi Tanzania kwani naamini kabisa kichwani kwake kuna kisima cha weledi, mbinu na mikakati mbalimbali. 'Hotspot' ikija kuwa 'hotstop' sijui itakuwaje labda yeye mwenyewe atatuambia, hata hivyo nakukaribisha sana mwanaharakati. Kaka Boniface Makene hongera sana, na jitihada hizi zisambae kama wanavyosambaa mashahidi wa mnara wa mlinzi.

Karibuni

IGIZO HALIJAISHA ....!!

2006-01-30T17:28:00.000+03:00

'Heshima na ufahari viwe juu yenu nyote wanablogu wapya na hata wale wa zamani pia. Kwa masikitiko makubwa kabisa, nawaomba radhi kwa kuchemsha kupata maneno ya kiswahili ya 'episode' na 'scene' ili niweze kuweka hoja katika muktadha.

Majimbo, Wabunge, Walalahoi na Maslahi ndio muktadha ninaouweka kwenu hadhira ya blogu hii leo, yaani hi ni kwa wote wale wasomaji tu, wasomaji na wachangiaji na hata wachagizaji pia. Fanani wenu leo nimekumbuka kwamba kumbe lile igizo ambalo Idya Nkya na wengine kadhaa ambao tulidhani limekwisha, basi tulipotea kudhani vile kwani ile ilikuwa ni 'episode' ya kwanza ya igizo lenyewe.

Majuma kama mawili hivi yaliyopita igizo liliendelea na hii ndio 'episode' yenyewe. Wabunge wa Bunge la 'Jamhuri' ya Muungano wa Tanzania, wakiwa katika semina ya Wabunge pale katika ukumbi wa Karimjee Dar es Salaam walileta hoja nzito na tete ya kutaka kuongezewa maslahi 'marupurupu' zaidi ya viwango vilivyopo sasa kwa Wabunge. Hoja hiyo pia ilisindikizwa na kuongezwa kwa kipindi cha Ubunge kutoka miaka mitano kama ilivyo sasa hadi miaka saba. Hiyo hoja ya kuongezewa muda japo haijawa tete sana lakini mimi naipa uzito wake wa hali ya juu. Kwa mfano, ndani ya hilo Bunge la sasa hivi kuna wabunge kadhaa ambao vipindi walivyokaa bungeni na zaidi ya miaka 15 na wengine ni zaidi ya miaka ishirini, sasa kuna swali najiuliza, Mbunge yupo Bungeni akiwakilisha jimbo moja tangu miaka ya 70 mpaka leo hii, na hakuna mabadiliko chanya aliyoyafanya jimboni kwake, bado anahitaji kuongezewa muda? Dhamira ya mabadiliko ya kimaendeleo si suala la mtu tu kujiamulia bali ni utashi wa mhusika wa dhamira hiyo. Naomba nimpe 'tano' Mh. Nimrod Mkono mbunge wa jimbo la Musoma Vijijini kwa kujitolea kwake katika kuleta maendeleo jimboni kwake. Zaidi ya kuwa mbunge kwa kipindi cha 2000/2005 sidhani kama aliwahi kuwa mbunge tena. Lakini yanyosemwa kuhusiana na maemdeleo ya jimbo lake ni chanya tupu, huyu bwana hata wapinzani walimpigia ndogondogo ya kupewa nafasi ya kuendeleza na yale ambayo ameyadhamiria katika kuleta maendeleo kwa watu wa Musoma Vijijini.

Suala la kuongezewa maslahi limeamsha hisia za wengi miongoni mwa wanajamii katika nchi hii ya wadanganyika. Wabunge wanataka ongezeko la posho za vikao vya Bunge kutoka Shilingi laki moja wanayopata sasa, ongezeko la mshahara kutoka Shilingi milioni moja na laki mbili wanazolipwa sasa, na posho ya jimbo ambayo ni shilingi milioni moja, akimaliza kipindi chake cha miaka 5 ya ubunge analipwa kiinua mgongo cha Shilingi milioni thelathini.

'Episode' hii ndio haswa ninayoijadili leo. Kwanza kabisa naomba niwakumbushe wenzangu hapa nyumbani na ughaibuni pia; kima cha chini mshahara kwa Mtanzania 'mwanajimbo' si zaidi ya Shilingi sabini elfu kwa mwezi, madaktari wanadai nyongeza ndogo tu ya mshahara, wabunge wetu kwa asilimia kubwa kabisa hawakai kwenye majimbo yao wanayoyawakilisha bungeni na ni nadra sana pia kuonekana kwenye hayo majimbo mara wanapopata ubunge. Hawajui ukweli wa matatizo yanayowakabili hao waliowapa hiyo 'kula'. Wabunge wetu kwa kweli wameanza kuonyesha uhalisia wao wazi wazi, wamesahau kutueleza mikakati na vipaumbele katika kutatua matatizo yanayowakabili wananchi huko majimboni na kukurupuka kudai fidia ya mitaji waliyoiwekeza katika kutafuta huo ubunge wenyewe. Hii ni ishara tosha yenye kuonyesha dira ya miaka mitano ya hawa wabunge wetu. Wanadai posho katika kipindi ambacho nchi imekumbwa na baa kubwa la njaa, na sikumsikia wala kusoma popote pale ambapo Mbunge huyu ameomba ruhusa kwenye hiyo semina ili kwenda kuwatembelea wananchi wanaokaribia kufa na njaa huko majimboni mwao! Wakati ambapo wanadai nyongeza hiyo, wengine watakwenda tu kusinzia to bungeni, sijui na sisi tuwadai kodi ya matumizi mabaya ya rasilimali za bunge kwa kugeuza viti kuwa vitanda?

Ujumbe Wangu

2006-01-27T17:43:00.000+03:00

Lile shindano la kumtafuta mlimbwende wa utalii ndo linaelekea elekea kushika hatamu sasa bila shaka ikiwa tu 'halitaghairishwa kama ilivyo ada', basi litafanyika Februari 25, 2006 pale katika hoteli ya Ngurdoto mkoani Arusha. Mwaka jana Bi. Nancy Sumari naye aliamsha shangwe za Wadanganyika kwa kuvishwa taji 'la kizushi' la Miss World Afrika kutoka Miss World. Lakini je? hivi ni kweli kuna usawa katika kuandaa mashindano haya na kumpata mrembo wa dunia? Hilo swali mimi, naamini na watu wengine wengi bado tunajiuliza. Jamani shindano la urembo wa dunia na hata hilo la mrembo wa utalii na utitiri wa mashindano ya namna hiyo, bado hayana sura ya kweli ya kumpata binti mrembo wa dunia hata kidogo. Binti wa Kiafrika ambaye Chemi anatunyambulia hapa 'ni tofauti sana na binti wa kutoka bara lingine' kimaumbile na kimuonekano. Sasa katika hali kama hii unampataje mrembo wa dunia?

Natoa changamoto ya kuanzisha vuguvugu la kutaka usawa katika masuala yote yanayogusa jamii zetu kimataifa. Kwanza tuanzie na hili la urembo ambalo Bi. Chemi Che Mponda amelirudisha katika fikra zangu. Kwa mtazamo wangu ni vigumu sana kumpata mrembo mmoja wa dunia. Kwa sababu huyo mwanamke wa Kihaya ambaye atakuwa mnene, aliyesuka kipilipili, mwenye rangi yake halisi kabisa awe ni mweusi au mweupe atakayevaa vazi la Kihaya aende akashindane na binti kutoka uingereza ambaye ni mwembamba, mrefu, mwenye nywele zilizowekwa madawa na mabinti kutoka Asia, Amerika na mabara mengine kwa pamoja washindanishwe kumpata huyo mrembo mmoja akakubalika mbele ya majaji na watazamaji hayupo.

Jamani naomba niwe muwazi kabisa kwa hili nitakalolisema hapa. Wazungu na waarabu wamefanikiwa kwa asilimia zaidi mia moja kuwafanya waafrika waone kila kile ambacho ni chao basi ni cha kishenzi na hawastahili kuwa nacho hata kidogo, na vile vya kwao ni bora. Hebu wewe unayesoma hapa sasa hivi, jiulize kuhusu jina lako, hizo nguo ulizovaa, muziki unaopenda kusikiliza, hata vipindi vya luninga unavyopenda kuvitazama, na mambo kadhaa wa kadhaa, je unaweza usema unaringia Uafrika wako?. Juzi juzi hapa wakati mheshimiwa Rais wa Jamhuri ya Muungano 'wenye utata' wa Tanzania ndugu Kikwete wakati anawaapisha mawaziri katika baraza lake la Mawaziri hakuna ambaye nimemuona akiwa amevaa hilo linalopigiwa chapuo kuwa ni vazi la taifa. Ila tunaambiwa kuna vazi la Taifa ambalo Michuzi alimbamba Mwanamuziki Stara Thomas akikatisha mitaani na moja ya mitindo yake. Hata Waziri mwenye dhamana ya kuulinda Utamaduni jamani???!!! Pia ninaomba tafsiri halali ya Ibara ya 14 (g) ya Sheria ya Mwenendo wa Mashtaka ya Jinai ya mwaka 1985 kama ilivyokuwa ikirekebishwa. Ibara hiyo inasomeka hivi;

14. A police officer may without warrant arrest ..................

(g) any person who does any act which is calculated to insult the national
emblem or the national flag;

Mtanisamehe kwa 'kimombo' sheria zetu hazisomwi na Wazigua, Wachaga, Wazaramo, Wamakonde na makabila mengine ila zinasomwa na Makaka na Madada Wasomi 'the Learned Brothers and Sisters' ndio maana mpaka leo zipo katika lugha hiyo. Sina hakika pia kama kuna mkakati wa kuzitafsiri pia.

Kusema ukweli na yakini kabisa tunahitaji mapinduzi ya kimtazamo na kifikra kwani sisi ni sisi na hatuwezi kuwa wao kwa sababu hata wao hawawezi kuwa sisi kamwe.

Mjadala wa kupata neno blogu kwa kiswahili naona unazidi kupaa angani kwani wachangiaji naona wanabunga bongo kwelikweli tukazi uzi jamani ipo siku tuatalipata hilo neno tu.

Nipo Wenzangu!

2006-01-17T17:48:00.000+03:00

Kwanza natoa pole kwa familia za mahujaji zaidi ya 345 ambao wamefariki huko Maka katika harakati za 'kumpiga mawe shetani' ikiwa ni sehemu ya ibada 'tukufu' ya Hijja. Pia natoa pole (kwa maana kazi ilikuwa ngumu) na hongera (kwa maana imekamilika) kwa Mh. Rais Kikwete kutangaza baraza lake la mawaziri na manaibu waziri ambao idadi yao jumla ni 60, japo Wadanganyika wengi tumekubali kwa 'shingo upande' ukubwa wa baraza hilo, lakini mpangilio wa wizara na uteuzi wenyewe jinsi ulivyofanyika kama vile kupanguliwa, kuongezwa na 'kwa wanawake kupewa wizara nyeti' kwa kiasi fulani umeonyesha dira ya taifa letu kwa miaka mitano ijayo ya utwawala huu.

Kaka Macha amenikumbusha juzi kwa barua pepe juu ya ukimya wangu katika blogu. Ahsante kwa kunikumbusha japo sikuwa nimesahau hata kidogo juu ya mchango wangu bloguni. Nimepitia maandiko ya Tupende Urembo Asili ambayo Chemi ameiandika na kuchangiwa na wanablogu kadhaa kama vile Boniface Makene ambaye ripoti yake ya mwezi imenisisimua mno.

Nilitumia muda mrefu kupitia kurunzi la Msaki na uchambuzi wa hotuba ya Mh. kikwete. Nimetumia fursa hiyo pia kusoma maandiko ya ndugu yangu Reginald Miruko. Duh! Kaka Msangi ama kweli wewe ni mwanaharakati, maandiko yako yana ishara kadhaa. Mashairi ya Mkwinda pamoja na washairi wengine bloguni yamenivutia sana, hongera kwa ushairi mzuri ambao ninaamini ni moja ya nguzo kuu za kukikuza Kiswahili. Harakati za ndugu yangu Nyembo nazo ni za mfano wa kuigwa.

Bwaya ndugu yangu, uliyoyaandika wewe, wanablogu wote pamoja na kauli mbiu ya blogu yangu (soma aya tatu za mwisho), ndio haswa tunachotakiwa kufanya ili kubadilisha kizazi hiki.

Pia naomba niweke andiko hili hapa juu ya mustakbali , kwa wakati huu bado tunaendelea na tafsiri ya nyaraka mbalimbali kwa Kiswahili.

Leo wanablogu wenzangu nawatonya; mwenzenu mimi ni mfanyakazi wa kujitolea katika Kituo cha Sheria na Haki za Binadamu na juma hili ndio tumeanza mwaka rasmi baada ya mapumziko ya kirismasi na mwaka mpya, hivyo nipo katika harakati za kuweka mambo sawa hapa kituoni kwetu 'Kituo cha Msaada wa Sheria Magomeni' na nitakapo kaa sawa tu, nitaandika kuhusu andiko la Chemi juu ya Urembo na Uafrika. Nimevutiwa sana na mjadala huo kwa sababu hiyo ni moja sehemu tuliyoshikiwa akili na hao wembamba wa ulaya wanaotaka na sisi tuwe kama wao kwa kila hali na kila kitu.

Amani ya Kweli na Iwe Kwenu Nyote!!

Hotuba ya Mh. J.M. Kikwete, Rais wa Jamhuri ya Muungano wa Tanzania

2006-01-03T12:18:00.000+03:00

Leo nimefanikiwa kuipata 'bila ya shaka kwa ukamilifu wake' hotuba ya Mhe. J. M. Kikwete Rais wa Jamhuri ya Muungano wa Tanzania alipolihutubia bunge wakati wa kulifungua rasmi mjini Dodoma tarehe 30 Disemba, 2005. Baada ya shukrani ndefu kwa wale wote waliomsaidia 'kihalali na uovu' katika kufanikisha ushindi wa kishindo kwa Chama chake Mhe. Rais alianza moja kwa moja na tambo za ushindi wa kishindo wa CCM. Lakini pia alikiri uchanga wa demokrasia katika Tanzania kutokana na matokeo ya jumla ya uchaguzi. Ameelezea Majukumu ya Msingi ya Serikali ya Awamu ya Nne, na mwisho akatoa hadhari zake kwa viongozi wa serikali na wabunge, alisema "Mwishowe Tusialumiane".

Wananchi wote tuisome na kuielewa vizuri hotuba hiyo ili tuitumie kama 'reference' huko mbele ya safari.

Mwanzo wa Ari Mpya, Nguvu Mpya na Kasi Mpya!

Mpo?!!

2005-12-31T12:56:00.000+03:00

Mwanaharakati mwenzetu ametuaga kwa kusema kwamba hatokuwepo nasi kwa takriban mwezi mzima hivi! Duh! Kwa heri lakini sio mbaya hata siku moja moja ukishuka dimbani na kutupa salamu tu!

Haya ni majibu yangu ya chemsha bongo kuhusu Afrika ambayo nimeichomoa leo kutoka kwa Ndesanjo, sijagezea kaka!!. Hii ni changamoto kweli kweli juu ya uelewa wetu kuhusu bara letu Afrika kwani asilimia nilizozipata huko zinaonyesha ni kwa kiasi gani tunatakiwa kufanya jitihada za hali ya juu kuifahamu Afrika na kila kinachoihusu. Nimeifanya hata ile chemsha bongo ya kujaza ramani ya Afrika lakini nimeifanya kuanzia ile nyepesi kabisa mpaka ile ngumu kiasi, Duh!.

Ndesanjo amesisitiza tuweke picha kwenye blogu zetu, naweka hii hapa!

Hii ilikuwa mwaka 2004 katika Mkutano wa wadau wa uchaguzi kutoka katika makundi mbalimbali ya kijamii. Mimi 'niliyesimama' na Fredrick Mkatambo hapa kushoto kwangu tuliwakilisha kundi la watu wenye ulemavu kupitia Kituo cha Habari juu ya Ulemavu ICD. UNDP Dar es Salaam.

Mjadala kuhusu neno blogu kwa Kiswahili sijui umeishia wapi? Wakati huo huo nafanya jitihada za dhati kuipata hotuba ya Mhe. Rais wa Jamhuri ya Muungano wa Tanzania Jakaya kikwete alipolihutubia bunge jana.

Baragumu Limepulizwa!!!

2005-12-30T11:26:00.000+03:00

Baragumu wakaribishwa, Ila kwa taarifa yako, ni punde tu tumemuaga Msekwa. Huu ujio wako bila shaka umekuja kuongeza nguvu katika harakati zetu za kupanua wigo wa wanablogu mahiri, wenye dhamira ya kuiweka Afrika huru, Uhuru huo ni wa kujitambua sisi wenyewe kwanza, kutambua nyakati, na pia kutambua Mazingira. Ili kuweza kuyakabili hayo na mengine ni lazima tujue nini hasa kilitokea kisha kuuelewa kwa uzuri kabisa Kasri letu bado si pomoni hivyo ujio wako ni wa maana sana kwetu sisi 'washamba' tunaokumbatia utamaduni wetu. Karibu tukidumishe Kiswahili, tuutangaze utamaduni, na pia tulete mapinduzi kwa kusafisha kwanza fikra zetu halafu tuwaingie na wenzetu.

SAA YA UKOMBOZI NI SASA!!!!

Karibu Sana!!

Utatu Umetimia!!

2005-12-29T18:59:00.000+03:00

Hatimaye jina la Waziri Mkuu wa Jamhuri ya Muungano wa Tanzania chini ya utawala wa awamu ya nne ya uongozi chini ya Rais Jakaya Mrisho Kikwete limewekwa wazi na kupitishwa kwa kura 212 na Bunge leo tarehe 29 Disemba, 2005 naye si mwingine bali ni aliyekuwa waziri wa Maji na Mifugo ndugu Edward Lowassa. Hiyo ni moja katika hatua mbalimbali za kuusimika uongozi wa nchi ambapo jana ndugu Samwel Sitta, waziri wa zamani wa Sheria na Katiba alipitishwa kwa kura nyingi mno kuwa Spika wa Bunge la Jamhuri ya Muungano wa Tanzania, Ambapo leo hii Bi Anna Makinda alipitishwa kuwa Naibu Spika. Bila ya shaka ukiacha kazi ya kuchagua kamati mbalimbali za Bunge itifaki chache sana zitakuwa zimebaki katika ukamilisho wake. Akitoa shukrani mara tu baada ya kuaribishwa rasmi katika kiti cha uspika alitoa nasaha ambayo imenifanyaq binafsi nikae na kufikiria kusema haya na wenzangu katika blogu (bila shaka mdahalo wa neno mbadala la blogu halijapatikana). Mheshimiwa Sitta alitoa kauli zenye kuonyesha kwa kiasi amekomaa katika siasa za nchi hii. Aliwakumbusha Wabunge wakati huo akiwa kule mkoani Kilimanjaro namna alivyokuwa mzee wa Speed and Standard akimaanisha Kiwango na Kasi kauli ambayo iliamsha shangwe bungeni. Akiongozea katika hotuba yake hiyo fupi, aliwaomba Wabunge pamoja na Mawaziri wasitoe majibu ambayo hayana utatuzi kwa matatizo halisi ya wananchi na kusisitiza kuwa Wabunge waache mzaha Bungeni.

Kauli hiyo ya Mhe. Spika imenifanya nijiulize mara kwa mara, hivi wabunge wetu kweli watarudi majimboni kuyatafutia majibu yenye utatuzi mahitaji yetu?, je? ataelewa kweli kilio cha ndugu yangu Makene juu ya mke wake Mama Masha na wakesha hoi kibao huku jimboni? Kwanza huyu mbunge wetu hakai huku jimboni kwake, miaka nenda rudi yeye anaishi huko anakoishi akiwa na miradi yake yoote huko pamoja na familia yake, nilikuwa nikimuona huku jimboni wakati uchaguzi unapokaribia karibia. na kwa katika uchaguzi huu, mara ya kwa kumuona ni kipindi kilee cha kura ya maoni ya kumpata mgombea ubunge na udiwani ambapo baada ya kutoa takrima alipitishwa, ya pili ni pale kampeni ilipoanza rasmi ambapo sasa alitoa takrima kwa wadanganyika pale jimboni hapa aligawa peremende 'hata babuyangu alipata japo kibogoyo, fulana, kofia, beji vitenge na kanga 'bibi yangu aliambulia na kuvua lile kaniki lake lililochanika', vyote hivi vikiwa na sura yake na ya mgombea urais wa chama chake, ya tatu hata sikumbuki vizuri ilikuwa wapi ila ya mwisho ni siku ile alipotambulishwa rasmi na mheshimiwa mgombea urais wa chama chake, na juzi nilimuona kupitia katika runinga kule Dodoma 'Makao Makuu ya kufoji' bungeni wakati anaapishwa ili atukimbie rasmi jimboni, na mara chache kuoneka vikaoni bungeni na kurudisha mtaji wake aliouwekeza kwa wampa kula wakati wa kampeni. Huku jimboni kwake inawezekana kabisa kwamba igizo ndio limeisha limeisha mpaka baada ya miaka mitano yaani 2010?

Nimetandaa!!

2005-12-27T20:38:00.000+03:00

"Tupo katika wakati mgumu sana katika historia ya Ulimwengu, wakati ambapo utu lazima uchague mustakbali wake. Kadri dunia inavyokuwa inategemeana na nyepesi, mustakbali nao mara moja unakuwa hatarini. Ili tuweze kujongea mbele, ni lazima tujiunge pamoja ili kuleta jamii endelevu duniani ambayo inaundwa kutokana na kuheshimu uhalisia, haki za binadamu, haki ya kiuchumi na kuwa na utamaduni wa amani. "

"Hakuna ambaye amezaliwa akiwa ni raia mwema, hakuna taifa lililozaliwa likiwa tayari na demokrasia. Zaidi, yote hiyo ni michakato ambayo inaendelea kujitokeza katika maisha yetu. Vijana lazima wajumuishwe tangu wanapozaliwa. Jamii inayojiondoa kwa vijana wake, basi itajiuguza muda wote."

Hapo juu, nimenukuu sehemu za hotuba ya Mtumishi Mkuu wa Umoja wa Mataifa Bw. Kofi Annan, aliyoitoa katika Mkutano wa Dunia wa Mawaziri wanowajibika kwa Vijana. Maneno katika hotuba za hawa viongozi wetu ni za kutia hamasa sana, kiasi kwamba vijana tumekuwa ni watu wa kuishi kwa matumaini miaka nenda rudi.

Mimi ni mwancahama wa MRADI MAALUM wa MUONGO WA Umoja wa Mataifa wa, Elimu kwa Maendeleo Endelevu 2005-2014 gonga hapa nimeshiriki katika mradi baada ya kupata mwaliko kutoka kwa rafiki yangu aliyeko Ujerumani ambaye ndiye miongoni mwa watu wa mwanzo kabisa kushiriki katika mradi huu. Moja kati ya shawishi kubwa nilizozifanya katika mradi huu ni kuhamasisha matumizi ya lugha mbalimbali ili uonekane kweli ni wa kimataifa na kuwafikia walengwa kwa lugha wanayoielewa wao kwa urahisi zaidi na pia kuwahamasisha vijana wajiunge pia. Kwa hakika nimefanikiwa katika kushawishi matumizi ya lugha mbalimbali, lakini kwa vijana kujiunga sijapata majibu ya kuridhisha kwa hilo! na kwa sasa mimi pamoja na baadhi ya vijana wenzangu kutoka Afrika Mashariki tuna jukumu la kutafsiri nyaraka za mtandao huo kwa lugha ya kiswahili tukiwa kama sehemu ya timu ya wanaojitolea katika mradi huu gonga hapa na ukishawishika jiunge tafadhali. Mimi pia ni mwanachama wa mtandao wa vijana wa taking it global gonga hapa usome habari zake.

Katika mitandao yote hii, na mingine kadha wa kadha utaona ushiriki wa vijana wa kiafrika ni mdogo ama haupo kabisa. Nakubaliana na wengi kwamba moja kati ya vikwazo katika ushiriki wetu ni ukosefu wa taarifa, hata hivyo pia zile ambazo tunazipata ni taarifa ambazo si sahihi na mara nyingi zinakuja zikiwa tayari zimeshachelewa mno.

Nashawishika kutoa hamasa kubwa kwe vijana wenzangu, jamani tusilalamike tuu, sisi wenyewe tuna utatuzi .

KABLA HATUJAKARIBIA UKAMILIFU WA DAHARI .....

2005-12-27T14:45:00.000+03:00

Hakika leo ni siku njema sana kwangu. Nina furaha isiyo kifani kupata makaribisho mazuri kutoka kwa wanablogu wa Kiswahili. Kaka Macha! mimi pia nilikuwa mvivu katika kujifunza hesabu shuleni, lakini nimemuelewa na kumkubali ndugu Mija kwa hesabu zake "Habari chanya + Jamii hasi = Jamii chanya. Ahsante kwa chagizo hilo na nimeliweka katika akili yangu ili niweze kuliandikia. Nimekaribia kweli kweli ndugu fikrathabiti, mark msaki, egidio, mwandani, na wanablogu wote!!

Jamii ya Watanzania, hata Afrika kwa ujumla wake, tumepoteza mapenzi ya dhati na nchi zetu. Machache sana kwa leo nitayatolea mfano, pia ninaamini yameshasemwa sana; Kuna ule wimbo wa "Tanzania...Tanzania... Nakupenda kwa moyo wote........." maneno ya ule wimbo yanakaririka na kuimbika kwa ustadi mkubwa sana, nakumbuka mara ya mwisho ule wimbo kuimbwa katika mashule yetu ni miaka ya tisini kipindi kile mimi namalizia shule ya msingi. Leo hii ukikutana na vijana 10 tu wa Kitanzania na ukawaomba wakuimbie japo beti mbili tu za wimbo huo mzuri, labda 3 kati yao wataweza kukuimbia maneno yale matano ya mwanzo na yaliyobaki yatamun'gunywa mpaka uchoke mwenyewe. Lakini leo hii, kijana unayemuona ni lazima atakwambia anajua karibu nyimbo zote katika albamu la senti hamsini yule jamaa mhuni wa kule kwa joji kichaka. Hayo ndio tuliyonayo kwenye jamii yetu sasa hivi, ama kweli hiki ni kizazi kipya na cha ajabu!!

Nipo pamoja na wale wote ambao wanautukuza tamaduni zao. Hapa nina maanisha matumizi ya lugha ikiwa ndio moja ya nguzo kuu za utamaduni. Leo hii, tuna aina ya muziki ambayo imeshika hatamu katika afrika ya mashariki, na kwa hapa Tanzania inafahamika sana kama bongo flava, kadiri siku zinavyozidi songa mbele, wanaibuka waimbaji wapya, hata hivyo tangu nianze kuusikiliza muziki huu, naona bado hatujapata wawakilishi wa kutosha katika kututambulisha. Angalia mavazi yao, midundo ya nyimbo zao, hata lugha pia, halafu malizia na ujumbe katika hizo nyimbo ndio balaa!! Hapa mimi nina chagizo naliweka; tunataka Habari chanya + Jamii hasi = Jamii chanya. Tunafanya kuwaamsha hawa mambumbu wanaokebehi tamaduni zetu?

Bado tuna kazi kubwa ya kuweka wazi uzalendo wetu kivitendo kabla ya ukamilifu wa dhari maana hata bado hatujaukaribia.

Bado ninatafakri juu ya neno blogu kwa lugha yetu, nitakapolipata nitaliweka hadharani.

Mapambano yanaendelea

Hodi Hodi!!

2005-12-26T17:04:00.000+03:00

Ni takriban miezi tisa sasa tangu nilipoanza kuperuzi blogu mbali mbali duniani. Kwanza iliniwia vigumu sana kuelewa maana halisi ya blogu, lakini kadiri siku zilivyozidi kusonga mbele bila kutusubiri akina sisi nilianza kwa taratibu kuelewa nini haswa lengo la blogu. Nimesoma blogu nyingi na kwa mra kadhaa kujaribu kutengeneza lakini kutokana na teknolojia hii kuwa ni mpya kabisa, iliniwia vigumu kwa kipindi chote hicho kuweza kutengeneza hiyo blogu yangu. Na hata zile ambazo nimejaribu kuzitengeza sikumbuki tena viunga vyake. Nilihamasika zaidi baada ya kuanzishwa kwa hizi blogu za Kiswahili, nakumbuka blogu ya kwanza kukutana nayo kwa lugha hii ni ya Kaka yangu Ndesanjo ambayo nilipitia moja makala zake zinazotoa maelekezo ya namna ya kunzisha blogu na kwa kiasi fulani nikafanaikiwa kuanzisha hii blogu yangu.

Madhumuni ya blogu hii ni kama kichwa chake kinavyosomeka "Mtandao wa Mawazo na Habari Chanya". Katika upashanaji habari kuna njia mbalimbali ambazo mpashaji na yule anayepashwa huzitumia. Habari yoyote ile inapotolewa, ni lazima itakuwa na lengo la kutolewa kwake. Kwa kipindi kirefu sana, Watanzania tumekuwa tukimezeshwa habari hasi zenye lengo la kutuondoa katika upekuzi na utafiti huku tukibaki na mapukupuku ya ujinga yatokanayo na utandawazi.

Tumetawaliwa kiakili kiasi kwamba tumesahau kabisa sisi ni akina nani. Sasa basi, kwa kupitia blogu hii, tutaamshana, kukumbushana na kupeana hamasa ya kujitambua kwa kupeana habari chanya na mawazo jengevu. Ili tuweze kujenga jamii chanya, tunahitaji umoja, mshikamano, kujielewa na kuelewana, kuhabarishana, n.k. Nipo nanyi nyote na ninaomba kujiunga nanyi.

NIMEPIGA HODI, BILA SHAKA NITAKARIBISHWA!!!!!!!! HONGERA WANABLOGU WOTE WA KISWAHILI!!